Caro papà ti scrivo…

vecchio_padre_papà_21secolo

‘O   P  A  T  E

 

Veneva ‘a luntano…

‘E passe

sempe cchiù lente…

‘E capille

sempe cchiù  ghianche…

E pe’ tramente ca s’avvicinava

me turnaveno a mmente,

chiano chiano,

tutt”e ppene

e tutt”e sacreficie

ch’aveva suppurtato

pe’ dda’ a nnuje figlie

chello ca isso nun aveva avuto…

quanta iurnate doce ce ha rialato,

quanta iurnate doce…

Pe’ nnuje ha faticato,

pe’ nnuje ha fravecato quacche cosa,

a nnuje isso penzava,

nuje sulamente

èremo ‘o scopo ‘e tutt”a vita soja.

Facevemo ‘ammuina… cinche ‘e nuje

int’a tre stanze

putite mmagginà che succedeva…

eppure,

manco na vota

ch’avesse perzo maje chella pacienza

ca ll’è stata cumpagna tutt’’a vita.

Giacchette, cazuncielle, maglie, scarpe,

pe’ nuje ‘e ccose sempe belle e nove,

ma ‘ncuoll’a isso sempe panne viecchie…

“Io so anziano – diceva – vuje guagliune

avita figurà!”

… L’aggio visto…

chiano chiano

veneva ‘a luntano…

‘o passo

ancora cchiù lento…

‘e capille

ancora cchiù ghianche…

… ma ‘npont’’ musso ‘o pizzo a rrisa ‘e sempe,

nu pizzo a rrisa ca te ncatenava

cu’ na catena fatta sulo ‘e bene…

Chisto era papà mio, nu galantomo

cu’ n’ànema e nu core

ca i’ credo sule ‘e sante

teneno ‘mpietto,
…..‘e sante sulamente!

Print Friendly

LASCIA UN COMMENTO